Saturday, 1 February 2014
My column published in daily @SindhGlobe 01 feb 2014 #SINDH #Pakistan
مهوش عباسي
سنڌ کي پوئتي ڌڪڻ جو ذميوار ڪير آهي؟
سنڌ ڌرتي جيڪا پنهنجي پنج هزار سال قديم تاريخ، ٻولي، مهمان نوازي، ثقافت، تهذيب ۽ تمدن جي ڪري دنيا ۾ مشهور آهي. ان تي ڪيترائي ڀيرا ڌارين جا وار، غيرن جون يلغارون ۽ ڪاهون ٿي چڪيون آهن، تنهن هوندي به اڄ تائين سنڌ ڌرتي پنهنجو وجود قائم رکندي آئي آهي، جنهن جو سبب سنڌ جا بهادر ۽ بي خوف سپوت آهن، جن وقت سر پنهنجي ڌرتي جي حفاظت ڪئي آهي ۽ ڪندا رهندا. هندو برادري به سنڌ جو حصو آهي، هند ۽ سنڌ جي ڌار ٿيڻ سان هندوستان ۽ سنڌ ۾ موجود سنڌي هندن کي انتهائي صدمو رسيو پر سنڌ ۾ موجود سنڌين هندن کي ڀائرن جيان سنڌ ۾ رهايو ۽ سندن ڏک سک جا ساٿي رهيا. اڄ به جڏهن ڪنهن به سنڌي هندو کي ڪا به تڪليف يا پريشاني ٿئي ٿي ته اسان جي دلين ۾ انهن لاءِ همدردي، احساس ۽ ڏک پيدا ٿئي ٿو. ڪڏهن ته هندو برادري کي ايترو ته مجبور ڪيو وڃي ٿو جو هو پنهنجا گھر پنهنجي ڌرتي ڇڏي هندوستان ۽ ٻين ملڪن ڏانهن لڏپلاڻ ڪرڻ تي مجبور ٿي وڃن ٿا، هندو برادري جي ماڻهن کي اغوا ڪرڻ، تشدد جو نشانو بڻائڻ، سندن نياڻين کي زبردستي مسلمان بڻائڻ جهڙا افسوسناڪ واقعا پيش ايندا رهن ٿا، انهن واقعن جا ذميوار انتهاپسند ۽ ننڍي سوچ رکڻ وارا ماڻهو آهن. سنڌ اندر هندو برادري غير محفوظ بڻيل آهي، تازو ٿيل عمرڪوٽ ضلعي جي شهر ڪنري ۾ هندو ناري کي وحشين پنهنجي وحشت جو نشانو بڻايو کيس ۽ سندس پٽ روپ چند ڪولهي کي نشو پياري هندو ناري سان اجتماعي لڄالٽ ڪئي وئي. سندس پٽ نشو ملڻ سبب فوت ٿي ويو، روح ڏڪائيندڙ هي پهريون واقعو نه آهي، عمرڪوٽ ضلعي ۾ اهڙا ڪيترائي واقعا ٿين ٿا، جيڪي نه ئي رپورٽ ٿين ٿا نه وري منظر تي اچن ٿا. جيڪڏهن انهن مان ڪو واقعو منظر تي اچي به ٿو ته ان جا جوابدار گرفتار نه ٿا ڪيا وڃن، ڇو ته اهڙن واقعن ۾ ملوث جوابدار طاقتور هوندا آهن، جيڪي اهڙن ماڻهن جا پوئلڳ هوندا آهن، جن جي خلاف ڳالهائڻ يا ڪارروائي ڪرڻ پاڻ مارائڻ برابر هوندو آهي. سڀ واقعا ڏاڍا افسوسناڪ آهن، پوءِ هو سنڌ ۾ موجود هندو برادري سان ٿيندا هجن. سنڌ ڌرتي سان ويساهه گھاتيون هجن يا وري ڌرتي جي معصوم ماروئڙن سان زيادتيون هجن، سرڪاري توڙي سماجي طرح هر کاتي ۾ سنڌي ماڻهن سان ظلم ٿيندو رهيو آهي، ڪڏهن ڪالاباغ ڊيم ۽ ذوالفقار آباد شهر جون ڳالهيون ڪري سنڌي ماڻهن جي دل آزاري ڪئي ويندي آهي، ڪڏهن سنڌ جو پاڻي بند ڪيو وڃي ٿو، ڪڏهن وري سنڌي نوجوانن جي ڪراچي شهر جي تعليمي ادارن ۾ داخلا تي پابندي لڳائي وڃي ٿي، ڪڏهن ڏاڍ ۽ ظلم جي انتها ٿي وڃي ٿي. تعليم لاءِ واجھائيندڙ، نوڪرين ۽ پگھارون نه ملڻ لاءِ احتجاج ڪندڙن تي پوليس طرفان شيلنگ ۽ لاٺي چارج ڪئي وڃي ٿي، اهڙن واقعن ۽ ڪيترن ئي پرامن احتجاجن ۾ سنڌي مرد توڙي ناريون سخت زخمي ۽ فوت پڻ ٿيا آهن، دل روئيندي آهي ۽ چوندي آهي ته اهڙي واقعن جو نشانو بڻيل هر ماڻهو جي گھر وڃجي ۽ ان جي داد رسائي ڪجي، انهن کي ڪڏهن به اهو محسوس نه ٿيڻ ڏجي ته اهي اڪيلا آهن، اهڙي ڌرتي جتي ٻارن جا هٿ مزدوري يا پنڻ لاءِ نه هجن، ٻارن جي هٿن ۾ قلم ۽ ڪتاب هجن، سنڌ ۾ موجود هر ڇوڪرو توڙي ڇوڪري تعليم يافته هجي، غربت جي گھاڻي ۾ پيسجندڙ عوام غربت مان نڪتل هجي، برابري هجي ۽ آزاد سوچ هجي. جيڪڏهن اهو سڀ ممڪن ٿيندو ته سنڌ ڌرتي تي ٿيندڙ حملن ۽ ڌارين جي يلغارن کان آجپو ملندو ۽ نشانو بڻيل هندو برادري توڙي سنڌ جو عوام سک جو ساهه کڻندو. سنڌ ۾ موجود عام عوام غريب آهي، غريبي ختم ڪرڻ لاءِ حڪمت عملي جوڙڻ جي ضرورت آهي، سنڌ ۾ موجود سياسي پارٽيون توڙي ڪيترائي ادارا ۽ اين جي اوز ان تي ڪم به ڪري رهيا آهن پر حقيقي طور تي عمل ٿيندي ۽ ڪاميابي ملندي نظر نه اچي رهي آهي، سياسي پارٽيون سنڌي عوام جو استعمال ڪرڻ کان سواءِ ٻيو ڪجھه نه ٿيون ڄاڻين. هر دفعي ڪا نه ڪا نئين پاليسي ڪو نئون ايجنڊا ٺاهي، عوام کي سبزباغ ڏيکاري گمراهه ڪيو ويندو رهيو آهي، هر دفعي سنڌ ڪارڊ استعمال ڪري ووٽ بئنڪ حاصل ڪري اليڪشن کٽي وڃي ٿي، هن وقت بلاول ڀٽو زرداري سرگرم نظر اچي رهيو آهي، جيڪو سنڌ فيسٽيول جي نالي تي سنڌ ڪارڊ استعمال ڪرڻ جي ڪوشش ڪري رهيو آهي، سنڌ جي اثاثن، تاريخ ۽ تهذيب جون ڳالهيون ڪيون پيون وڃن، حيرت جي ڳالهه اها آهي ته اهي ڳالهيون هن وقت ياد ڪيون ويون آهن، جڏهن مڪاني چونڊون مٿي تي آهن ۽ پاڪستان پيپلز پارٽي جي ساک ملڪ مان ختم ٿي رهي آهي، پ پ پنج سال حڪومتي دور ۾ سنڌ سان جيڪي ويساهه گھاتيون ڪيون ۽ رات جي انڌيري ۾ جيڪي سنڌ مخالف بل پاس ڪرايا، سنڌ جو عوام انهن کي ڪڏهن نه ٿو وساري سگھي. ڪڏهن سنڌ جي ٻيٽن تي وار ته ڪڏهن وري مڪاني نظام جي ذريعي ڪارو نظام مڙهڻ جون تياريون ڪيون ويون، ان وقت به ڌرتي ڌڻين سنڌ تي وار برداشت نه ڪيو ۽ هڪ ٿي آواز اٿاريو. سنڌ جي نمائندا سڏائيندڙ پارٽي جي اڄ به سنڌ ۾ حڪومت آهي ۽ سنڌي ماڻهو هڪ دفعو ٻيهر غلط فهمي ۾ مبتلا آهن، پنهنجي پنج سالا حڪومتي دور دوران پيپلز پارٽي سنڌ ۾ انقلاب آڻي نه سگھي، سنڌ جي عوام کي ياد رکڻ گھرجي ته سنڌ سان محبت ۽ جمهوريت جون دعوائون ڪندڙ پيپلز پارٽي پنهنجي دور ۾ سنڌ کي کپائڻ ۾ ڪا ڪسر نه ڇڏي، ان لاءِ ٻيهر اعتبار ڪرڻ کان پهريان انهن کان پڇاڻو ضرور ڪرڻ گھرجي، ڏسڻو هي آهي ته ڇا هو هن وقت سنڌ سان سچائي رکن ٿا ؟ ۽ واقعي ۾ سنڌ جي تاريخ ۽ ثقافت لاءِ قدم کڻي رهيا آهن يا پنهنجو ووٽ بئنڪ ٻيهر وڌائڻ ۽ سنڌي ماڻهن جو اعتماد حاصل ڪرڻ لاءِ ٽوپي ڊرامو ڪري رهيا آهن . هن ترقي يافته دور ۾ جيڪڏهن اڄ به سنڌ جو عام عوام ۽ ٻهراڙي پوئتي آهي ته ان جا ذميواري عوام کي غلام سمجھندڙ رياست ۽ سنڌ ۾ قائم ٿيندڙ حڪومتون آهن، ان سان گڏ ان جو سبب وڏيرا ۽ جاگيردار آهن. يعني حڪمران طبقو، طاقتور طبقو، سماج ۾ هميشه کان ڏاڍو اهو ئي رهيو آهي جيڪو طاقتور هوندو آهي. پوءِ اهو طاقتور ذهنيت ۾ هجي يا ملڪيت ۾. سنڌي عوام کي نظر انداز ڪرڻ سبب ڪٿي سنڌ جي ترقي ۽ تعليم هزارين سال پوئتي نه ٿي وڃي. اهڙي صورتحال ۾ سنڌ جي عوام کي سڄاڳ ٿيڻ گھرجي ۽ سنڌ جي بقا ۽ وجود لاءِ حقيقي جدوجهد ڪرڻ گھرجي.
-
Sunday, 5 January 2014
My column published in Daily awami awaz 06-01-2014 #MQM #Altaf #Sindh #AltafVoiceOfMasses
سنڌ ورهائڻ جا بيان آخر ڇو؟
مهوش شبير عباسي
ايم ڪيو ايم سربراهه الطاف سنڌ ۽ پاڪستان کي ٽوڙڻ جون ڳالهيون ڪري رهيو آهي سندس اهو شيوو رهيو آهي ته جڏهن به کيس ڪنهن سوڙهو ڪيو آهي ته سندس پاران هر ڀيري سنڌ کي ٽارگيٽ بڻايو ويو آهي. چيو پيو وڃي ته چند ڏينهن اندر کيس عمران فاروق قتل ڪيس ۾ سزا ملڻ واري آهي ۽ سنڌ اندر دهشتگردن، ٽارگيٽ ڪلرز، ڀتا خورن ۽ ٻين قوتن خلاف آپريشن جو ٽيون مرحلو شروع ٿي چڪو آهي اهڙين حقيقتن تان ماڻهن جو ڌيان هٽائڻ لاءِ گذريل ڏينهن حيدرآباد ۾ ايم ڪيو ايم جي ڪارڪنن کي خطاب ڪندي سنڌ کي ٽوڙڻ ۽ پاڪستان کان الڳ ملڪ جي گھر جهڙا مطالبا ڪري چڪو آهي.
سيپٽمبر 2001 ۾ هن ٽوني بليئر کي خط لکيو جنهن ۾ هن آءِ ايس آءِ تي الزام لڳايا ۽ سخت مخالفت ڪندي ان اداري کي ملڪ دشمن قرار ڏنو ۽ ان جي خاتمي جي درخواست پڻ ڪئي ان سان گڏ الطاف مغربي انٽيليجنس جي جاسوسي لاءِ افغانستان ۾ جاسوسي ڪرڻ لاءِ پڻ لکيو بدلي ۾ هن سنڌ جي حڪمراني طلب ڪئي ، ان کانسواءِ ملڪ جي باني محمد علي جناح خلاف پڻ ڪيترا ڀيرا غلط بياني ڪري چڪو آهي کيس برطانيا جو رهواسي سڏيندو رهيو آهي محمد علي جناح کي پاڪستان جو شهري تسليم ڪرڻ کان انڪار ڪندو رهيو آهي فوج جي سابق سربراهه ۽ چيف جسٽس افتخار چوڌري خلاف پڻ بيان ڏئي چڪو آهي.
سنڌ جي ورهاڱي جو خواب الطاف کان اڳ جواد بيگ ڏٺو جنهن 1973 ۾ ڪراچي کي ميٽروپوليٽن ٺاهڻ جو مطالبو ڪيو ٻي صورت ۾ ڪراچي کي الڳ صوبو ٺاهڻ جي گھر ڪئي وئي ان سان گڏ جناح پور ، مهاجر صوبو، الطاف نگر جهڙا مطالبا سندن پاران ٿيندا رهيا آهن. هر ڀيري پنهنجا مطالبا مڃرائڻ خاطر سنڌي ماڻهن کي کوڙ سارا طعنا مهڻا ڏنا وڃن ٿا جڏهن ته گذريل 24 سالن کان هر جمهوري حڪومت توڙي ڊڪٽيٽرن جا ساٿاري رهيا آهن 11 سالن کان سنڌ اندر سندن گورنر مقرر ٿيل آهي ان باوجود هر ڀيري پنهنجا مطالبا مڃرائيندا رهيا آهن پوءِ بلدياتي نظام هجي، نوڪرين ۽ وزارتن ۾ حصو پتي هجي، سنڌي شاگردن لاءِ تعليمي ادارن ۾ داخلائون بند ڪرائڻيون هجن، پنهنجي ڪارڪنن تان ڪيس ختم ڪرائڻا هجن، هر حڪومت ۾ پنهنجا مطالبا مڃرائي مزا ماڻيندا رهيا آهن.
سنڌ جي وحدت خلاف ڳالهائڻ ڪروڙين سنڌين جي دل آزاري ڪرڻ آهي، سنڌي ماڻهن ورهاڱي وقت مٿن مرڪون نڇاور ڪندي کين پنهنجا شهر ڏئي ڇڏيا ، پنهنجا ڪاروبار ڏئي ڇڏيا ايتري تائين جو پنهنجو قومي تشخص انسانيت جي ڪري خطري ۾ وجھڻ لاءِ تيار ٿي ويا اڄ اهو ڏينهن موٽي آيو آهي جو سنڌي ماڻهن جو قومي تشخص خطري ۾ آهي نتيجو سڀني جي سامهون آهي سياڻن چيو آهي ته چڱائي جو بدلو چڱائي هوندو آهي ان بدلي ۾ اسان کي ڇا ملي رهيو آهي؟ حقيقت ۾ غلطي اسان کان ٿي هئي جو اسان انسانيت جي ناطي کين سيني سان لاتو تنهن ڪري ان جو نتيجو به اسان کي ڀوڳڻو آهي ۽ ان جو ازالو به اسان کي ئي ڪرڻو آهي . جيڪڏهن اسين اها ڳالهه مڃون ته شهرن ۾ متحده جي اڪثريت آهي پر سنڌ جي ٻهراڙي ۽ شهرن اندر رهندڙ ماڻهو پنهنجي شهري ڀائرن کان پڇن ٿا ته توهان هر ڀيري ٺهندڙ حڪومتن سان گڏ رهيا آهيو ان ايتري عرصي دوران اوهان سنڌ جي حقن بابت ڪهڙو ڪم ڪيو آهي ، توهان جيڪڏهن ڪجھ ڪيو آهي ته صرف ۽ صرف پنهنجا مفاد ماڻيا آهن هر ڀيري شهرن جون حڪومتون حاصل ڪرڻ جي جاکوڙ ۾ رهيا آهيو جيڪو اڄ به توهان جو مطالبو آهي.
اهڙي قسم جي مطالبن سان صورتحال خراب ٿي سگھي ٿي، الطاف جو چوڻ آهي ته ملڪ جي معاشي صورتحال خراب آهي اردو ۽ سنڌي ڳالهائيندڙن ۾ برابروسيلا ورهايا وڃن کين برابر حق ڏنا وڃن جيڪڏهن ايئن آهي ته ملڪ جي معاشي صورتحال کي سڌاريو وڃي، ٽارگيٽڊ آپريشن ۾ ساٿ ڏنو وڃي نه وري اهڙا بيان جاري ڪري سياسي راند کيڏي سماجي صورتحال بگاڙي وڃي، جيڪڏهن ڪنهن علائقي ۾ گئس، بجلي، رستن، صحت يا تعليم جهڙا مسئلا آهن ان کي حل ڪرڻ بجاءِ اهڙن علائقن کي الڳ صوبو يا ملڪ ته نه ٺاهيو ويندو جيڪڏهن ايئن ڪيو وڃي ته پوءِ پاڪستان ۾ سوين ملڪ ٻيا به قائم ٿي سگھن ٿا، ضرورت ان ڳالهه جي آهي ته ملڪي صورتحال، معاشي توڙي سماجي مسئلن تي اسيمبلين ۽ پارليامينٽ ۾ ڳالهائي مسئلا حل ڪيا وڃن، نه وري انهن جو استعمال ڪري سياسي مفاد ماڻيا وڃن اهڙي صورتحال ۾ ملڪ ۾ موجود سياسي پارٽين تي ذميداري عائد ٿئي ٿي ته ڪير به ملڪ ۾ نفرتون ڦهلائڻ جهڙا قدم کڻي ته ان جو مقابلو ڪن.
الطاف جي بيان جي رد عمل ۾ بلاول ڀٽو زرداري سنڌ ۽ سنڌي عوام جو ساٿ ڏنو آهي جنهن تي ان کي ثابت قدم رهڻ گھرجي ۽ کين جلد ئي پارٽي جو اجلاس گھرائي الطاف جي بيان تي سنجيدگي سان غور ويچار ڪري ان جو حل ڳولهڻ گھرجي ته جيئن صوبي جي صورتحال خراب نه ٿئي الطاف هڪ برطانوي شهري آهي ۽ برطانيا ۾ ويهي هو پاڪستان ۽ سنڌ خلاف ملڪ دشمن بيان جاري ڪري رهيو آهي جنهن جو برطانيا حڪومت کي نوٽيس وٺڻ گھرجي ان سان گڏ پاڪستان جي وفاقي حڪومت تي به ذميداري عائد ٿئي ٿي ته هو برطانوي شهري جي اهڙي بيان تي برطانوي حڪومت کان پڇاڻو ڪن. سنڌ جي گادي واري شهر ڪراچي جي آئينده جو فيصلو غيرن جي هٿن تائين پهچڻ کان اڳ ۾ سنڌي ماڻهن کي پنهنجو ڀرپور رد عمل عالمي قوتن اڳيان رڪارڊ ڪرائڻ گھرجي.
Sunday, 29 December 2013
Saturday, 28 December 2013
my column in daily awami awaz 29-12-2013 #MehwishAbbasi #Aman jo khwab
امن جو خواب ڪڏهن پورو ٿيندو !؟
مهوش شبير عباسي
گذريل ڪيترن ئي سالن کان پاڪستان ۾ خوف جي فضا قائم آهي. سوال اهو ٿو پيدا ٿئي ته ان خوف مان نڪرڻ جو ڪهڙو رستو آهي، پاڪستان ۾ ماڻهو پنهنجي مذهب ۽ فرقي ۾ رهندي به خوف ۾ مبتلا آهن. هن سال عاشوري تي راولپنڊي ۾ مذهبي ويڙهه جو خوفناڪ منظر سامهون آيو جنهن سبب شهر ۾ ڪرفيو لاڳو ڪيو ويو ڪيترائي ماڻهو زخمي ٿيا، مدرسن ، امام بارگاهن ۽ مذهبي ڪتابن کي شهيد ڪيو ويو. مطلب ته هاڻي ملڪ جون حالتون ايتريون ته خراب ٿيڻ لڳيون آهن جو ڪرفيو لڳائڻ ۾ به دير نه ٿي ڪئي وڃي، هن ملڪ ۾ هاڻي نماز به نه ٿي پڙهي سگھي، مغربي وزيرستان ۾ نماز پڙهندڙ فوجين تي فائرنگ ڪري کين شهيد ڪيو ويو . دنيا اندر موجود اسلامي ملڪن ۾ فرقيواريت يا مذهبي بنيادن تي فساد ضرور ٿين ٿا پر ڪٿي به مسجدن، امام بارگاهن، جمعي نماز، جنازي نماز، عيد نماز يا محرم جي جلسن ۾ اهڙي طرح فائرنگ، بم ڌماڪا يا دهشتگرد حملا نه ٿا ٿين ڇو ته ٻين ملڪن ۾ صورتحال ضابطي ۾ آهي پر اسان وٽ رياست مذهبي ڇڪتاڻ کي روڪڻ ۾ ناڪام وئي آهي، جڏهن ته رياست تي ذميداري عائد ٿئي ٿي ته هو هر ماڻهو جي جان ۽ مال جي حفاظت ڪري ۽ انهن کي سياسي ، سماجي توڙي مذهبي آزادي مُهيا ڪري پر رياست توڙي حڪومتي ادارا ان سڀ ۾ ناڪام آهن.
طالبان ، انتها پسند ماڻهن ۽ دهشتگردن پاڪستان جي عوام کي محدود بڻائي ڇڏيو آهي ، ماڻهن کي ڊيڄاري ، ڌمڪائي ، خوفزده ڪري رکيو وڃي ٿو ، انهن جو مقصد ادارن ، پوليس اسٽيشنن ، بازارن ، اسڪولن توڙي عبادت گاهن کي ويران ڪرڻ آهي جنهن سبب هو اهڙين جڳهن تي حملا ڪري رهيا آهن ، دهشتگرد هر ڳالهه کي سڪيورٽي جو مسئلو بڻائڻ چاهن ٿا پوءِ اها ڪرڪيٽ هجا يا وري مسجدن ۾ عبادت . ملڪ ۾ هينئر تائين فرقا واريت جي فسادن ۾ هزارين ماڻهو قتل ٿيا آهن ملڪ ۾ هر طرف ننڍا ننڍا وزيرستان قائم ڪيا ويا آهن اهڙا ادارا جن ۾ نوجوانن کي انتها پسندي جي تربيت ڏني وڃي ٿي ۽ جهاد جي نالي تي معصومن جون زندگيون ورتيون وڃن ٿيون ، پاڪستان جو عوام اڄ مذهبي انتها پسندي جي خوف ۾ ورتل آهي جڏهن ته ملڪ ۽ مذهب دشمن بنا ڪنهن خوف جي هٿيارن جي بنياد تي پنهنجا مقصد ماڻي رهيا آهن جنهن سبب انهن جي دلين مان قانون جو خوف ختم ٿيڻ آهي ۽ رياست پنهنجي رٽ قائم ڪرڻ ۾ ناڪام ٿي رهي آهي ، جيڪڏهن شروع کان ان طرف ڌيان ڏني وڃي ها ته اڄ مسئلو ايترو نه وڌي ها ، انهن سڀن مسئلن کي حل ڪرڻ جي زميواري حڪومت تي لاڳو ٿئي ٿي ان سان گڏ مذهبي عالمن تي به فرض آهي ته ملڪ کي اهڙي صورتحال مان نجات ڏيارن ، اهڙن واقعن ۾ ڪجھه مصنوعي مولوي ۽ عالم شامل آهن انهن خلاف ڪارروائي ڪرڻ جي سخت ضرورت آهي ڇو ته اهي به رياست جو حصو آهن ۽ انهن جا ڏوهه عوام آڏو آندا وڃن .
حڪومت ۽ رياستي ادارن کي گھرجي ته ملڪ ۽ عوام کي مذهبي انتها پسندي ۽ فرقا واريت جي فسادن مان نجات ڏئي ۽ امن امان جي فضا قائم ڪري ماڻهن کي خوف ۽ حراس مان نجات ڏئي ڇو ته هن وقت ملڪ مذهبي انتها پسندي جي ور چڙهي چڪو آهي، ماڻهن ۾ جهاد ۽ فرقا واريت جون سوچون منتقل ڪيون پيون وڃن ڪو به ماڻهو پنهنجي عقيدي مطابق آزادي سان عبادت به نه ٿو ڪري سگھي جيڪا هڪ افسوسناڪ ۽ پريشاني واري صورتحال آهي. اسلام امن ڀائيچاري ۽ سلامتي وارو مذهب آهي اسلام ڪٿي به جنگ، ويڙهه، انتها پسندي جو درس نه ٿو ڏئي اسانجو مذهب سلامتي وارو مذهب آهي. اميد ته اسانجي ملڪ کي جلد کان جلد اهڙن فسادن مان آجو ڪيو ويندو جيڪو فرض مذهبي اسڪالرن، عالمن توڙي حڪمرانن جو آهي .
Wednesday, 25 December 2013
Subscribe to:
Posts (Atom)



